9 oktyabr 2023-cü il tarixində Qeyri-Hökumət Təşkilatlarına Dövlət Dəstəyi Agentliyinin, Azərbaycan-Türkiyə Qadınlar Cəmiyyətinin və Azərbaycan-Türkiyə Evinin təşkilatçılığı, eləcə də Azərbaycanın İspaniyadakı Səfirliyinin dəstəyi ilə İspaniyanın paytaxtı Madrid şəhərində “Qərbi Azərbaycana qayıdış beynəlxalq müstəvidə” adlı nüfuzlu Avropa Forumu keçirilmişdir. Forumda müxtəlif ölkələrdən gəlmiş diplomatlar, beynəlxalq təşkilatların nümayəndələri, ictimai xadimlər və elm adamları ilə yanaşı, “F-Holding” MMC-nin təsisçi direktoru Fərid Mustafayev də iştirak etmişdir. Tədbir çərçivəsində Qərbi Azərbaycandan deportasiya olunmuş azərbaycanlıların hüquqları, onların ata-baba torpaqlarına qayıdış perspektivləri və beynəlxalq ictimaiyyətin bu məsələyə münasibəti geniş müzakirə olunmuşdur. Forumda çıxış edən natiqlər tarixə əsaslanan həqiqətlərin dünya ictimaiyyətinə çatdırılmasının vacibliyini vurğulamış və regionda davamlı sülhün və ədalətin bərqərar olunması istiqamətində atılacaq addımlar barədə fikir mübadiləsi aparmışlar. “F-Holding” MMC-nin təsisçi direktoru Fərid Mustafayev, həmçinin şirkətin sosial məsuliyyət çərçivəsində bu mövzuda təşəbbüslərə dəstək verməyə hazır olduğunu qeyd etmişdir. Forum, Qərbi Azərbaycan məsələsinin beynəlxalq gündəmə çıxarılması baxımından mühüm platforma kimi qiymətləndirilmişdir.
