26 iyul 2023-cü il tarixində “F-Holding” MMC-nin direktoru Fərid Mustafayev, icraçı direktoru Kənan Sadıqov, İspaniyanın informasiya texnologiyaları, süni intellekt və aerokosmik mühəndislik sahəsində ixtisaslaşmış “Aeronautical Engineering Services” S.L. şirkətinin rəhbərliyi, eləcə də İspaniyadan gəlmiş bir sıra nüfuzlu investorlarla əhəmiyyətli görüş keçirilmişdir. Görüşdə tərəflər potensial əməkdaşlıq imkanlarını, innovativ texnologiyaların tətbiqini və qarşılıqlı investisiya layihələrinin perspektivlərini müzakirə etmişlər. Tədbir çərçivəsində Naxçıvan Muxtar Respublikası Ekologiya və Təbii Sərvətlər Nazirliyinin nazir müavini Xanlar Mustafayev çıxış edərək Naxçıvanın zəngin ekoloji potensialı, təbii sərvətləri və regionun iqtisadi imkanları haqqında ətraflı məlumat vermişdir. Nazir müavini, xüsusilə Naxçıvanda balıqçılıq, ovçuluq və ekoturizm sahəsində mövcud təsərrüfatların və biznes imkanlarının əhəmiyyətini vurğulamış, İspaniyalı investorları bu sahələrlə daha yaxından tanış olmağa və qarşılıqlı əməkdaşlıq istiqamətində geniş müzakirələr aparmağa dəvət etmişdir. Görüş, həm iqtisadi, həm də ekoloji sahədə beynəlxalq əməkdaşlığın genişləndirilməsi baxımından mühüm əhəmiyyət kəsb etmişdir və gələcəkdə Naxçıvanın təbii sərvətləri əsasında reallaşdırılacaq layihələr üçün səmərəli zəmin yaratmışdır.
